Home » Our Language » News & Information » Warnikiyakaja-langwa jurra warnikilarrka

Warnikiyakaja-langwa jurra warnikilarrka

Australian Marriage Law Postal Survey




Karnumamalya Australia-langwa yirruwa yirringayindenama yikeningmudinama ena narriyangbijinama amangkadirra-ma nenukwarba keniyakayeni-yada nuwilyaba-manja nenungkwarba akwa didarringka karringiyakayini-yada duwilyaba-manja didarringka.

Aduwaba ena Australian law nayaminama wulka warnungkwarba akwa wurridarringka kayakayinama .

Nungkwurruwa yikakakburranginama mail-manja ena jurra emikirra Australian-langwa warnikiyakaja-langwa law.

Akina-manja jurra dukwa wurrakina yikabilyangkilabajama nungkwurruwa-wa yukwukwarrikwajinama akina law kajungwa nakina nenungkwarba keniyakayini-yada nuwilyaba nenungkwarba akwa didarringka kangiyakayini-yada duwilyaba didarringka.

Akina awilyaba-ma ayakwa akabiyangkilyabajama akina-manja jurra.

Ena-manja jurra kwuwekbalina dukwa yawa kiyamina, dukwa nara.

Kawiyebajina akina jurra ngalilangwa-manja akawiyebaja kamba kilawurrakajina warenjibawiya.

Nungkwuwa nara errikarruma nungkwulangwa ekirra akina-manja jurra akwa akawiyebaja kajungwa wurrukwala wurrikamarra amiyambena ningkarrikarrunguma.

Nara ayakwabijuma ebina nungkwuwekbalinuma!

Kingayindena-manja keningmudinama enena-langwa kandiya internet-manja www.abs.gov.au.